شي ناس حمقا
دارو التيقة
كلاو المرقة
شدو الزرقة
حطو الورقة
على بو فرقة
راس لمطرقة
قد البزقة
حالف يبقى
موالف السرقة
لمدينة غارقة
زنقة بزنقة
الطروق ضيقة
بالحفاري مزوقة
لقوادس مطرطقة
الروايح خانقة
الزبابل طبقة
على طبقة
تما تبقى
لفلاحة بلا سقا
المنح مفرقة
على ولاد النقا
المسكين بلا
ما يشقى
العيش مضيقة
المسؤول بابو مطرقة
ولعباد مشنقة
قانطة ومقلقة
طلع الدم
ما بقات حتى نقطة
البونية مقوقة
العين مزرقة
الراس مفلقة
الحيحة وكلام الزنقة
عباد الله مجوقة
فراجة وحلقة
ماكاين ما يتلقى
الجماعة مفرقة
فالقهاوي مشرقة
عينييها مبلقة
مكيفة ومبوقة
ماهياش مسوقة
الحياة مخربة
حتى حاجة
ما مطبقة
سياسة معيقة
باينة ومورقة
والناس متيقة
ناعسة …
وشكون يفيقا…
الزجال التاوناتي جمال العميمري/ديجو (فرنسا).
